Tatizo la harufu mbaya mdomoni husababishwa na mambo mbalimbali, ila sababu kubwa ni maambukizi ya bakteria au protozoa na kuoza kwa mabaki ya chakula.

Tatizo hili huweza kumkumba mtu wa jinsia yoyote na anaweza akajijua au asijijue kama mdomo wake unatoa harufu mbaya.

Binadamu sote tuna bakteria wa asili kabisa ambao kwa kawaida hawana madhara mdomoni kwetu na husaidia kumeng’enya mabaki ya vyakula pamoja na kupambana na vijidudu vya magonjwa.

Hawa ni bakteria wazuri kwetu na tunatakiwa kuwatunza kwa kutotumia vibaya kemikali kali na dawa ambazo zinaweza kuwaua, maana wakifa tutashambuliwa na bakteria wanaosababisha magonjwa kwa urahisi zaidi.

Kuna mambo mengi ambayo yanachangia mdomo kutoa harufu mbaya, miongoni mwa hayo ni pamoja na uchafu wa mdomo, magonjwa ya kinywa na meno, maambukizi katika njia ya hewa, kuoza kwa mabaki ya chakula mdomoni ambayo hubaki tusipopiga mswaki, uvutaji wa sigara, mdomo kuwa mkavu kwa muda mrefu, matatizo ya sukari, ini na figo.

Bakteria huozesha mabaki ya chakula ambacho hubaki kama mtu hatopiga mswaki. Pia bakteria hawa huweza kuongezeka na kurundikana katikati ya meno, kwenye fizi na kwenye ulimi na kuendelea na taratibu zao za maisha ikiwa ni pamoja na kutoa takamwili zao ambazo huongeza harufu mbaya mdomoni. Wanaweza pia kuua seli za mwili na kuzifanya zikaoza, uozo huo pia huongeza harufu mbaya mdomoni.

Tatizo hili huweza kutokea kwa sababu ya uwapo wa bakteria wanaosababisha harufu mbaya kwenye eneo la ndani zaidi ambako mswaki haufiki. Matokeo yake ni kwamba, hata ukipiga mswaki, wanaendelea kuwapo na harufu inaendelea.

Kwa tatizo hili, pata ushauri wa daktari na tumia dawa zote vizuri kabisa kama utakavyoelekezwa

Tushukuru kwamba kuna dawa nyingi na za bei nafuu kutibu tatizo hili na linatibika kabisa. Cha kwanza kabla ya yote katika matibabu ya tatizo hili ni kujua chanzo cha tatizo.

Muda mwingine unaweza kujitathmini mwenyewe, muda mwingine unaweza kusaidiwa na daktari. Anza kwa kupata ushauri wa daktari, hususan daktari wa kinywa na meno.

Ukijua chanzo cha tatizo hili matibabu yake ni rahisi zaidi.

Ikiwa umepatwa na tatizo hili, unaweza ukatumia dawa za kusukutua kama Hydrogen Peroxide, Chlorhexidine, Povidone-Iodine, Listerine. Hizi husaidia kusafisha mdomo vizuri na kwa urahisi zaidi, kuua bakteria mdomoni na kuleta harufu nzuri.

Dawa za meno husaidia kuondoa mabaki ya chakula, kupunguza vijidudu mdomoni na kuondoa harufu mbaya. Mfano ni Colgate, Whitedent na Sensodyne.

Dawa za kuua bakteria (Antibayotiksi),

Hizi ni dawa mahsusi kabisa kwa ajili ya kuua bakteria na kutibu magonjwa au maambukizi wanayoyasababisha.

Utashauriwa na daktari kulingana na aina ya wadudu ambao unao.

Pata ushauri wa daktari kisha tumia dawa hizi vizuri kama utakavyoelekezwa

Mambo ya kuzingatia, tatizo la harufu mbaya hutibika kwa urahisi na gharama nafuu, anza kwa kuhakikisha usafi wa mara kwa mara wa kinywa na meno.

Piga mswaki na/au sukutua kwa kutumia dawa ya kusukutua kila baada ya mlo na mara tu baada ya kuamka.

Endapo hata ukipiga mswaki na kusukutua bado harufu mbaya inaendelea, basi pata ushauri na matibabu kutoka kwa daktari wa kinywa na meno.

Tumia dawa zote vizuri kama utakavyoelekezwa na madaktari na wataalamu wa dawa .